ຂ້າພະເຈົ້າກໍເປັນບຸກຄົນໜຶ່ງທີ່ໃຊ້ຊີວິດປະຈຳວັນຄືມະນຸດທຳມະດາທົ່ວ ໆໄປ ແຕ່ແຕກຕ່າງຈາກຄົນອື່ນ ໆ ບ່ອນທີ່ຂ້າພະເຈົ້າ ມັກຢູ່ໃນປ່າຫລືໃນຖ້ຳ ເພາະຂ້າພະເຈົ້າມັກຫາຄວາມງຽບສະຫງົບ ແຕ່ຂ້າພະເຈົ້າກໍມີຄວາມຮູ້ສຶກນຶກຄິດ ແລະຄິດເຖິງຜູ້ອື່ນເປັນຄືກັນ ແຕ່ເປັນຄວາມນຶກຄິດໃນສິ່ງທີ່ດີງາມ ບາງເທື່ອຂ້າພະເຈົ້າກໍມີຄວາມຮູ້ສຶກທໍ້ແທ້ ອ່ອນລ້າ ແລະສິ້ນຫວັງ ຄືມະນຸດ ປະຊາຊົນຄົນທຳມະດາທົ່ວ ໆໄປ ແຕ່ໃນເມື່ອຂ້າພະເຈົ້າຕັ້ງໃຈຢ່າງມາທາງນີ້ແລ້ວ ຂ້າພະເຈົ້າຈະຮູ້ສຶກທໍ້ແທ້ສິ້ນຫວັງໄປຍ້ອນຫຍັງ ເພາະວ່າບໍ່ມີສິ່ງໃດທີ່ເຮົາຈະຮູ້ສຶກທໍ້ແທ້ ແລະເໜື່ອຍລ້າໄປກວ່ານີ້ອີກແລ້ວ ແຕ່ຄວາມສຸກຂອງຂ້າພະເຈົ້າຄື ການທີ່ໄດ້ກະທຳແຕ່ສິ່ງທີ່ດີໃຫ້ຈິດໃຈຂອງຂ້າພະເຈົ້າບໍ່ມົວໝອງ ໄປກັບສິ່ງທີ່ມະນຸດທົ່ວໄປມັກຈະມອງຂ້າມຢູ່ສະເໝີ ໆ ບາງເທື່ອຈິດໃຈຄົນເຮົານັ້ນຍາກນັກຈະຍັ່ງເຖິງ ແຕ່ຄວາມດີຫລືກຳດີຖ້າເຮົາເຮັດແລ້ວກໍຈະເກີດຜົນດີີກັບຕົວເຮົາເອງ
ຂ້າພະເຈົ້າໄດ້ຮຽນຮູ້ຊີວິດຂອງຜູ້ອື່ນ ຫລັງຈາກທີ່ຂ້າພະເຈົ້າໄດ້ອອກມາທຸດົງສ໌ ຂ້າພະເຈົ້າໄດ້ມາສຳຜັດກັບຊີວິດຂອງຜູ້ຄົນຫລາຍເຊື້ອຊາດ ຫລາຍສາດສະຫນາ ທຸກສາດສະຫນາລ້ວນແຕ່ສອນໃຫ້ຄົນນັ້ນກະທຳແຕ່ຄວາມດີ ແຕ່ຄົນກໍມີນານາຈິດຕັງ ຫລາຍ ໆຄົນກໍມັກຈະມີຄວາມຄິດເຫັນແຕກຕ່າງກັນອອກໄປ ບາງເທື່ອຂ້າພະເຈົ້າກໍມີຄວາມຄິດເຫັນແຕກຕ່າງ ຈາກຜູ້ອື່ນເປັນບາງເທື່ອ ແຕ່ຄົນເຮົານັ້ນ ບໍ່ມີຜູ້ໃດຜູ້ໜຶ່ງຫລອກທີ່ເກັ່ງຢູ່ຄົນດຽວແລະເກັ່ງຢູ່ສະເໝີ ຖ້າເຮົາບໍ່ປ່ຽນທັດສະນະຄະຕິເສຍໃໝ່ ສະຫລຸບວ່າຄົນເຮົາມີຄວາມຄິດເຫັນແຕກຕ່າງກັນໄປໄດ້ ແຕ່ຫາຮູ້ບໍ່ວ່າຄົນເຮົາທີ່ເກີດມາທຸກຄົນນັ້ນ ລ້ວນມີຄວາມດີຫລືກຳດີຕິດຕົວກັນມາທຸກຄົນ ແຕ່ຄວາມຊົ່ວຫລືກຳຊົ່ວ ຫລືບາບກຳນັ້ນຊິ ເຮົາມາສ້າງຂຶ້ນເພິ່ມເຕິມກັນໃນຊາດນີ້ເສຍຫລາຍກວ່າ
ຊີວິດທຸກຄົນລ້ວນມີຄວາມສຸກຄວາມຈະເລີນກັນທຸກຄົນ ແຕ່ຊີວິດຂອງຄົນບາງຄົນຫາຄວາມສຸກຫາຄວາມຈະເລີນ ແລະຫາທາງອອກຂອງຊີວິດບໍ່ໄດ້ເລີຍ ຂ້າພະເຈົ້າກໍເຄີຍເປັນບຸກຄົນໜຶ່ງທີ່ໄດ້ກ່າວມາໃນຂ້າງຕົ້ນນີ້ ຊີວິດຂອງຂ້າພະເຈົ້າໄດ້ຮູ້ຈັກຄົນມາຫລວງຫລາຍຈົນຈຳຊື່ບໍ່ໄດ້ ຂ້າພະເຈົ້າໄດ້ຮຽນຮູ້ວ່າທຸກຄົົນທີ່ເຂົ້າມາຫາຂ້າພະເຈົ້າ ຄົນເຫລົ່ານັ້ນ ມີທັງຄົົນທີ່ມີຄວາມສຸກ ແລະຄົົນທີ່ມີຄວາມທຸກ ຂ້າພະເຈົ້າບໍ່ເຄີຍຄິດວ່າຕົວເອງເກັ່ງຫລືດີກວ່າຄົນທົ່ວ ໆໄປ ແຕ່ຂ້າພະເຈົ້າຄິດຢູ່ສະເໝີວ່າສິ່ງທີ່ຂ້າພະເຈົ້າໄດ້ເຮັດນັ້ນ ບໍ່ເຄີຍເຮັດໃຫ້ຜູ້ໃດເດືອດຮ້ອນ
ໃນປັດຈຸດບັນມື້ນີ້ ຖ້າຖາມຂ້າພະເຈົ້າວ່າ ຂ້າພະເຈົ້າຮູ້ສຶກທໍ້ແທ້ ເໜື່ອຍລ້າ ແລະສິ້ນຫວັງບໍ ຂ້າພະເຈົ້າກໍຈະຕອບວ່າເຄີຍມີຄວາມຮູ້ສຶກ ເໜື່ອຍລ້າ ທໍ້ແທ້ ແລະສິ້ນຫວັງ ຂ້າພະເຈົ້າເຄີຍຖາມຕົວເອງ ແລະ ເຄີຍມານັ່ງຄິດວ່າ ຂ້າພະເຈົ້າມານັ່ງສວດມົນເພື່ອຫຍັງ ມານັ່ງສະໝາທິເພື່ອໃຫ້ເກີດຫຍັງ ແຕ່ຂ້າພະເຈົ້າຮູ້ວ່າຂ້າພະເຈົ້າມານັ່ງສວດມົນເພື່ອຫຍັງ ແລະມານັ່ງສະໝາທິເພື່ອຫຍັງ ຂ້າພະເຈົ້າຕອບຕົວເອງວ່າຂ້າພະເຈົ້າມີຄວາມສຸກເວລາທີ່ໄດ້ສວດມົນແລະນັ່ງສະໝາທິ ຂ້າພະເຈົ້າມີຄວາມຮູ້ສຶກເບີກບານໃນຈິດໃຈເວລາທີ່ຂ້າພະເຈົ້າໄດ້ກະທຳໃນສິ່ງເຫລົ້ານີ້ ຄຳວ່າຄວາມສຸກຂຶ້ນຢູ່ໃນໃຈ ແລະມັນຈະອຸດົມໄປດ້ວຍຄວາມຄິດທີ່ດີ ບໍ່ມີຮ້າຍ ບໍ່ມີໂລບ ບໍ່ມີຫລົງ ທຸກລົມຫາຍໃຈເຂົ້າອອກກໍຍັງມີຄວາມສຸກ ເມື່ອເຮົາພຶ່ງປາດຖະຫນາທີ່ຈະມີຄວາມສຸກ ຄວາມສຸກຂອງຂ້າພະເຈົ້ານັ້ນອາດຈະໝາຍເຖິງຄວາມວ່າງເປົ່າດ້ວຍ ຄວາມວ່າງເປົ່າຂອງຜູ້ທີ່ເຂົ້າມາປະພະລືິດປະຕິບັດທຳ ຄືຄວາມວ່າງເປົ່າທີ່ມີຄວາມສຸກທາງໃຈ ທີ່ຂ້າພະເຈົ້າສາມາດ ລະເລີກ ຮ້າຍ ຫລົງ ເຖິງກະນັ້ນການທີ່ຂ້າພະເຈົ້າປະພຶດປະຕິບັດທຳມານັ້ນ ຂ້າພະເຈົ້າກໍບໍ່ເຄີຍອວດ ອຸຕິ ວ່າຂ້າພະເຈົ້າເຫາະເຫີນຍ່າງອາກາດໄດ້ ຂ້າພະເຈົ້າຖືວ່າຂ້າພະເຈົ້າເປັນບຸກຄົນທຳມະດາທົ່ວ ໆໄປ ຂ້າພະເຈົ້າກໍຍັງເປັນຜູ້ຖືສິນ ຄົນຍ່າງດິນທຳມະດາທົ່ວ ໆໄປ ຈະແຕກຕ່າງຈາກບຸກຄົນອື່ນ ໆ ບ່ອນທີຂ້າພະເຈົ້າບໍ່ໄດ້ໃສ່ຮອງຕີນ ແລະບໍ່ກິນເຂົ້າທຸກມື້ວັນພະ ຖ້າມື້ທຳມະດາປົກກະຕິທົ່ວໄປ ຂ້າພະເຈົ້າຈະກິນເຂົ້າພຽງມື້ດຽວ ພຽງມື້ເຊົ້າເທົ່ານັ້ນ ຖາມວ່າຂ້າພະເຈົ້າເຮັດແບບນີ້ຂ້າພະເຈົ້າຈະໄດ້ຫຍັງ ຢ່າງນ້ອຍ ໆ ຂ້າພະເຈົ້າກໍໄດ້ຊະນະຈິດໃຈຂອງຂ້າພະເຈົ້າເອງ ຫລືສິ່ງທີ່ຂ້າພະເຈົ້າຕັ້ງໃຈແລະຖືສະຈະເອົາໄວ້ ຂ້າພະເຈົ້າກໍໄດ້ຄວາມສຸກທາງໃຈ ແລະຂ້າພະເຈົ້າກໍຈະປະພຶດປະຕິບັດຕາມນີ້ຈົນກວ່າຂ້າພະເຈົ້າຈະໝົດລົມຫາຍໃຈໄປຈາກໂລກນີ້ ຂ້າພະເຈົ້າມີນາມວ່າ " ເທບນິລການ "
ຂ້າພະເຈົ້າຂໍໃຫ້ຜູ້ທີ່ໄດ້ເຂົ້າມາອ່ານບັນທຶກສະບັບນີ້ ເປັນຜູ້ທີ່ຫລາຍໄປດ້ວຍປັນຍາ ຫລາຍໄປດ້ວຍຄວາມຮູ້ ຫລາຍໄປດ້ວຍຊັບສິນເງີນທອງ ແລະຫລາຍໄປດ້ວຍຄວາມສຸກແລະຄວາມດີ ທຸກ ໆທ່ານເທີດ ສາທຸ ສາທຸ ສາທຸ
No comments:
Post a Comment